最近在路試考車的地點，發現多了很多女性學生，而且年齡由剛成年至中年婦女都有；相反男學生就好似變得少咗，而且大以中年為多，後生仔十分少見。與舊時「18 歲即考車牌」的情況完全相反，仲記得以前好想拿拿聲成年，然後快快考完牌，就可以約埋班好友齊齊夜遊，四出食糖水；死慳死抵都要玩車。依家可能因為電子娛樂太多，試問早 7,8 年前，邊有咁多 PS3、XBOX、wii 遊戲機，或者iPhone、iPAD 等智能手機。所以近幾年，好多「宅男、毒男」等名詞出現，個個後生仔都大把娛樂。想開車？落機鋪，或者買隻碟，就可以自己在屋企死衝爛衝啦！
不過，講到尾，汽車始終是一樣奢侈品，淨計每個月支出最少 $3000，對於一班年輕人來說，不如慳多個錢，買部新電話好過。所以好多時見到中年人士學車，喺可能佢地事業有成，可以負擔起一輛車。
至於點解越來越多女性學車？原因好簡單，因為女性越來越多，加上開車不再是男人的權利。其實大家有留意的話，可以發現慢慢越來越多女性駕駛 SUV 車型，曾經跟不少女性朋友閒聊中得知，她們開 SUV 主要有兩個原因；第一，因為身高問題，如果駕駛一般的轎車，只可以望到較遠的地方，近處經常要伸直腰與抬高頭才可以看見，所以她們覺得 SUV 車身較高，可以更清晰睇到路面；其二，她們認為 SUV 車型較大，鋼水較好，在撞車時保護性更高，筆者還聽過，男友知道女友開車不太著重安全，於是就決定買一架比較「襟」撞嘅車。不是一桿打沉一船人，但都要講句，以後遇到開 SUV 的女性駕駛者，各位自己小心啦。
（以上純屬作者個人言論及創作，並無科學根據，亦不代表本公司立場。）
