東京改裝車展一直是車迷的天堂，而日產這次帶來一系列重磅作品，成功將「傳統車神」同「電動未來」拉埋一齊，亮點包括將經典 R32 GT-R EV化嘅概念車 「R32EV」，仲有最新 GT-R NISMO Special Edition，同其他多款前衛概念車。日產以賽車科技、創新設計同新舊交融，為車迷帶嚟無限驚喜。
日產工程師團隊將90年代嘅經典「戰神」R32 GT-R轉化成電動車型 R32EV，呢部車係由一班有心嘅日產工程師從2023年開始打造，目標係將「現代電動科技」融合R32嘅靈魂，唔單止保留到經典造型，仲賦予咗新嘅動力系統，完全係新舊世代嘅大碰撞。對於一眾「JDM信徒」嚟講，呢部車既有情懷，又有科技，簡直係一個完美嘅進化版。
除咗R32EV之外，展覽上另一大焦點就係 NISSAN GT-R NISMO Special Edition。呢款車注入咗日產最強嘅賽車科技，全面優化咗引擎內部結構，包括 活塞環、連桿同曲軸 等部件，提升到極致嘅平衡同精準度。配合碳纖維NISMO專屬引擎蓋，GT-R NISMO再一次刷新「戰神」嘅性能極限，對於追求速度同激情嘅朋友嚟講，呢部車絕對係終極選擇。
日產仲帶嚟最新 Fairlady Z 2025年版，仲會展示北美版新增嘅靚色「灣岸藍」，跑格十足。除此之外，仲有兩款 X-TRAIL 概念車：「X-TRAIL unwind concept」打造豪華戶外露營氛圍，仲可以沖一杯地道嘅Espresso；而「X-TRAIL remastered concept」則玩味十足，以先代X-TRAIL為基礎，加入復古元素，打造一個享受黑膠音樂嘅特別空間，為舊車帶來全新生活方式。
Caravan系列亦有驚喜，第五代災害支援概念車更進一步進化，融入咗 LEAF便攜式電池，提供實際災害支援功能，亦適合日常使用，喺需要時可以發揮強大支援力，真正做到多功能實用性同前瞻性兼備。
日產今次喺東京改裝車展真係大玩一場，由經典R32 GT-R EV化，到GT-R NISMO嘅極致性能，絕對可以滿足到唔同口味嘅車迷。尤其是R32EV，當我見到呢個消息，真係即刻諗到90年代嗰段「日系超跑黃金年代」，R32係幾多男人心目中嘅夢想車！而家竟然用咗電動化技術，令到經典變得更現代，仲可以延續「戰神」嘅傳奇。至於X-TRAIL嘅玩味概念車，真係幾有創意，完全展示到車輛嘅多元可能性。而Caravan災害支援車就充滿實際價值，尤其係現時咁多天災意外，呢啲實用車真係值得推廣。
總括嚟講，日產今次玩新亦顧舊，帶嚟嘅作品夠晒「味道」同驚喜，完全展示咗佢哋喺賽車科技、電動化同改裝世界嘅深厚功力。如果你係日產迷，或者鐘意改裝車，2025東京改裝車展，呢次一定唔可以錯過！