你有無諗過有朝一日去博物館，會遇到一個似人又似機械的存在？去到 Mercedes-Benz 博物館嘅話，你可能會驚喜地發現一位名叫 Andrea 的機械人坐喺 Legend Room 6 嘅長椅上。呢個來自 Hochschule der Medien Stuttgart（斯圖加特媒體學院，簡稱 HdM）嘅機械人能夠同周圍人互動，會轉頭、動手指、微笑，仲可以用八種語言回答問題。佢既冇明顯嘅性別特徵，名字同樣無分男女。由 2024 年 10 月 26 日到 11 月 3 日，Andrea 會作為嘉賓，喺博物館度呆足八日。
Mercedes-Benz 博物館館長 Bettina Haussmann 表示：「我非常期待 Andrea 嘅到來。我想知博物館嘅訪客會點樣對待呢個超似人嘅機械人，仲有佢會帶嚟啲咩新嘅互動方式？」
HdM 研究 Andrea 大概已經有兩年時間，主要係研究機械人點樣同社會環境互動。而今次 Andrea 嘅博物館之旅，訪客將會參與調查研究，了解人同機械人之間嘅互動效果。
HdM 人工智慧應用研究所所長 Christian Becker-Asano 教授解釋：「一個科技為主題嘅博物館係進行呢啲調查嘅理想場所。喺一個受控嘅環境中，Andrea 可以同擁有正面期待嘅訪客互動，呢啲人係嚟享受體驗同花時間感受未來科技。」
其實 Andrea 自 2022 年 12 月 7 日已經喺 HdM 首度亮相。佢來自日本，目的係令人工智慧變得更加具體可見。HdM 嘅應用人工智慧研究所，專門研究多模式人機互動，Andrea 就係其中一個重要嘅研究對象。
為咗探討機械人性別對人類反應嘅影響，HdM 刻意選擇咗一個中性化嘅機械人設計。Andrea 能夠坐直，並且可以做出 52 種上半身動作，從頭到肩膀再到髖部，每個部位都非常靈活。佢嘅面部表情更可以做出 13 種變化！當然，人工智慧要落地，互動係非常重要嘅一環。Andrea 能夠非常自然地同訪客傾計，仲可以用德語、英語、法語、意大利語同西班牙語等八種語言溝通，全部都係經過 AI 合成嘅聲音。
其實我一直好奇，人類同機械人之間嘅界線會去到幾模糊。Andrea 呢種中性化設計，唔單止係技術上嘅突破，仲好似係想提醒我哋，未來機械人唔一定有固定形象。去到 Mercedes-Benz 博物館，唔係單純睇車，仲可以睇到「未來科技同生活係點交集」。如果有機會，真係想即刻飛去睇下呢個同人類好似嘅「未來朋友」。你又點睇呢？
