為慶祝 PS3 遊戲《FIFA 13》熱賣，藝人高海寧（Samantha）以一身性感運動造型，出席於荷里活廣場舉行之『PS3《FIFA 13》球王盃總決賽』。高海寧先跟兩名壯男教練做熱身運動，再分別擔任龍門員及前鋒，過關斬將越過一個個雪糕筒射龍門，可惜高 Ling 貪靚，是日穿著3吋高高踭鞋，比賽時雞手鴨腳，幸好美貌搭夠，男教練們忍不住讓賽，最後高 Ling 成功取勝。現場同時進行『PS3 FIFA 13 球王盃』冠軍爭奪戰，由高 Ling 擔任足球評述員講波，之前曾飛到南非擔任世界盃主持的高海寧熟悉足球，她更透露常常捱夜在家睇足球賽事。最後一場冠軍爭霸戰，由高Ling擔任評述，兩位參賽者均以皇馬球隊作賽，最終黎煒豪以 4:0 擊敗對手，奪得「《PS3 FIFA13》球王盃」寶座，由高海寧頒發冠、亞、季軍寶座。
「《PS3 FIFA13》球王盃總決賽」
冠軍：黎煒豪 // 獎品：PlayStation®Vita 手提遊戲機、PS Vita《FIFA 13》遊戲及獎盃
亞軍：丘敏龍 // 獎品：PS Vita《FIFA 13》遊戲及獎盃
季軍：江栢濤 //獎品：PS Vita《FIFA 13》遊戲及獎盃
活動後高 Ling表示：「噚晚開通宵拍戲唔夠瞓，所以今日(著小背心)都有啲凍，雖然今日係足球活動，不過靚最緊要，我都係揀咗著高踭鞋。」高 Ling 表示自己曾做足球節目，熟悉足球賽則，講波無難度。高 Ling 笑指：「我小學時都係足球隊，因為腳長所以踢前鋒位置。」對於早前緋聞，她表示：「記者會後我喺街拍劇，好多附近嘅市民都嚟安慰我，好多謝大家嘅支持。同埋公司好愛錫我哋。而家忙緊拍賀歲片，嚟緊 12 月頭開拍電視劇《傳愛市務所》，會同陳法拉合作。」
