日日聽新聞，一時嘈政府官員邊個唔掂，個個禮拜示威要人落台，真係聽到厭。大熱天時，室外氣溫三十四五度，難為左一班街上停車熄匙等候既司機，真係陰功。人已經夠熱，仲要聽埋哂咁多令人火滾既新聞，唔通真係要當街除衫降溫？
梁振英話個廚房熱所以入去，我地一班車主就唔會貪車廂熱至上去掛。盧蘇眼見街上唔少司機仍會偷雞唔熄匙，實在無可厚非。尤其是現今在電動車及油電混合車尚未廣泛普及時，盧某早已表示過，停車熄匙應該要按季節執行，而非全年執行。儘管有所謂酷熱天氣警告豁免，但要每位司機都能即時查看並不容易。
何不簡易地在指定月份，容許日間全面豁免停車熄匙就算了？其餘時間大可繼續實施，一來司機及執法人員都能有簡單易明的熄匙分界，萬一司機被抄告票，只要執法人員出示溫度計，證明氣溫低於規定溫度，爭議都會少很多，真的要食牛肉乾也無怨了。反正梁特首想推行德政改善民生，盧某建議不如資助一般車主換油電車或電動車，等多些人可以合法停車涼冷氣，一次過改善空氣質素，又可加快環保汽車的普及，仲可能有助減少部分民怨呢！
盧蘇
Car1.hk《車事短評》專欄作者
（以上純屬作者個人言論及創作，並無科學根據，亦不代表本公司立場。）
