設計與科技的平衡藝術，Audi全新尾燈技術如何亮相？
車燈設計與技術發展，乍看之下好像非常相似，但其實背後是一場功能與美感之間的「拉鋸戰」。Audi A6 e-tron 成為首部擁有「四環尾燈發光設計」的量產車，這項嶄新技術背後，設計師與工程師究竟如何合作？Audi車燈設計師 Christoph Häußinger 和尾燈開發部門主管 Stefan Staudacher 為我們解開箇中奧秘。
四環尾燈發光設計，點解咁特別？
Christoph Häußinger：
「我哋花咗好多時間研究，點樣喺夜晚都能夠將 Audi 嘅標誌 – 四環完美展現出嚟。作為 Audi 最重要嘅品牌象徵之一，佢唔單止要好睇，仲要喺夜晚亮起時，依然具備標誌性嘅吸引力。」
早期嘅 Audi 概念車其實已經有類似設計，當時引起唔少好評，令佢哋決定將呢個設計引入量產階段。
設計與開發之間嘅「鬥智鬥力」
外觀設計一向有前瞻性，技術開發部門會唔會「潑冷水」？
Stefan Staudacher（大笑）：
「其實唔係潑冷水啦！發光四環呢個概念，技術層面上比想像中更複雜。尤其喺當時，歐洲市場嘅法規根本無相關規定，所以我哋要同時應對草案法例同最終規範，靈活地去調整設計。」
Christoph Häußinger：
「作為品牌標誌，四環唔單止要日間睇起嚟夠精緻，夜晚發光嘅效果亦要完美。要喺白色漆面下做出「紅光」效果，聽落唔難，但背後技術同工藝真係要極高水平。」
黑化套件壓軸登場！
「為咗迎合運動風格，我哋喺開發後期加入咗黑化套件，令前後四環標誌變成黑色。要做到黑色標誌同時具備高質感同一致性，確實係一項挑戰，」Stefan補充道。
車燈的未來：安全、個性化與數碼互動
兩位專家對車燈技術發展充滿熱情：
Christoph Häußinger：
「現代人追求個性化同數碼化，Audi車燈可以因應客戶喜好，自訂獨特嘅燈光簽名。同時，燈光仲可以同日常生活數碼互動，例如遠程操控，讓車主更享受駕駛樂趣。」
Stefan Staudacher：
「第二代數碼尾燈仲實現咗安全警示功能，可以喺發生意外或故障時，提早向其他道路使用者發出警告。未來嘅車燈，唔單止係照明工具，更係道路安全通訊嘅一部分。」
設計同技術的完美合作
兩位專家異口同聲表示，設計同技術開發係互相影響嘅，「車輛外觀設計、車燈切割造型同表面處理都需要緊密協調，咁樣先可以打造出一部真正完美嘅 Audi。」
Stefan笑言：「我哋嘅努力，成就咗 A6 e-tron 嘅發光四環，期待大家親身感受呢份光芒！」
Audi 呢個「發光四環」真係玩出新高度，將設計美學同科技完美融合。喺車尾望到呢個亮起嘅標誌，好似 Audi 喺黑夜中向你輕輕道個「Hi」，型格之餘又充滿未來感！我諗，呢啲細節位就係豪華品牌嘅過人之處，睇得出 Audi 一路走嘅數碼化之路，絕對唔係玩嘢！車燈不單係裝飾，而係安全同互動嘅橋樑，唔知其他品牌又會唔會跟住挑戰呢個「光環」王者？大家一齊拭目以待啦！